XOSÉ MARÍA DÍAZ CASTRO

O Equipo de Normalización Lingüística do IES poeta Díaz Castro vén de coordinar unha serie de actividades que tiveron como obxectivo divulgar a figura deste magnífico poeta de Guitiriz que lle dá nome ó noso centro, cumprindo así o compromiso que asumiu desde que o centro leva o nome do escritor. Tamén desexamos aportar o noso gran de area para que se faga xustiza cun poeta que, ó noso entender, non se ten valorado polo de agora como se merece.

As actividades que se levaron a cabo para tal fin foron as seguintes:
• Exposición na biblioteca do noso centro escolar de libros, fotografías, documentos e mesmo obras inéditas do escritor. Toda esta valiosísima información sobre o escritor, tanto na faceta humana como literaria, foi cedida pola asociación cultural Xermolos. A exposición foi presentada a toda a comunidade escolar polo profesor do IES e presidente de Xermolos Alfonso Blanco, amigo persoal e bo coñecedor do poeta e da súa obra. Tamén a visitaron alumnos e mestres do colexio de Parga e Lagostelle.
• Difusión da súa obra poética Nimbos entre o alumnado coa colaboración dos profesores do departamento de lingua e literatura galega, pois nas súas aulas léronse e comentáronse os seus poemas.
• Creación dun blog sobre a vida e obra do poeta. Esta foi unha contribución dos profesores encargados da biblioteca.
• Introdución na páxina web do instituto dunha escolma da súa poesía feita polo Equipo de Normalización Lingüística.
• Reedición da súa obra poética en galego Nimbos, o que foi posible grazas á mediación do Concello e á implicación da Consellería de Cultura.
• Creación dunha revista por parte da asociación cultural Xermolos adicada ó escritor. Nela figura un comic, feito por Xavier Varela, sobre a súa vida e obra .
• O principal acto de homenaxe ó poeta tivo lugar o venres 4 de maio no IES poeta DíazCastro co motivo da presentación da reedición de Nimbos e da revista Xermolos. A el asistiron os alumnos de 6º de primaria do colexio de Lagostelle de Guitiriz, así como os alumnos de 3º, 4º, 5º e 6º do colexio de Parga e algúns mestres de ambos colexios. Nestes colexios tamén recibiron información sobre o escritor e a súa obra e colaboraron no acto co recitado duns poemas que previamente seleccionaran.
Esperamos continuar con máis actos nos vindeiros anos.

O Equipo de Normalización.